Pages

Tuesday, 21 February 2012

பெரும்பான்மையான குற்றச்சாட்டு நம்மில் பலர் படித்து முடித்ததும் வெளி நாட்டினை நோக்கி சென்று விடுவதால் தான் இந்தியா இந்த நிலைமையில் இருக்கிறது என்பதுதான்.. இதை கேட்கையில் இது முற்றிலும் உண்மை தான் என்பது போல் தான் நமக்கு தோன்றும்..ஆனால் அங்கு வேலைக்காக சென்றிருக்கும் ஒரு தோழியின் மனக்குமுறலை கேட்டபின் அதற்கு பதில் சொல்ல என்னால் முடியவில்லை..

தோழியின் வார்த்தைகள்.:-

சமீபத்தில் தளம் ஒன்றில், எங்களை (வெளிநாட்டில் வேலை பார்ப்பவர்களை) கண்டால் வெட்கமாகவும், வேதனையாகவும் இருப்பதாக தோழர் ஒருவர் குறிப்பிட்டு இருந்தார். அதோடல்லாது நாங்கள் பகட்டிற்காக அந்நியதேசத்தில் கையேந்தி நிற்க்கிறோமாம்...மேலும் திறமை படைத்தவர்கள்( அப்போ நீங்க எல்லாம் என்ன முட்டாள்களா ???)எல்லாம் அயல் நாடு போய்விட்டதால் இந்தியா இன்று இந்நிலையில் உள்ளதாம்.

எனக்கு எப்போதும் ஒன்று மட்டும் புரிவதில்லை, என் நாடு, என் நாடு என தொண்டை கிழிய கத்தி எங்களை குற்றம் சாட்டும் நாட்டுபற்றுகளே..இன்றைய இந்தியாவின் நிலை உங்களால் தன் என நான் சொல்வேன்.

என் வீட்டில் எதுவும் கோளாறு என்றால், நான் வாடகைக்கு அமர்த்தி இருக்கும், என் வீட்டில் வசிக்கும் நபரையே கேள்வி கேட்பேன். அப்படி இருக்கும் போது சொந்த மண்ணில் வசித்து அதை இந்நிலைமைக்கு கொண்டு வந்த நீங்கள் குற்றவாளிகளா இல்லை அயல் நாட்டில் வசிக்கும் நாங்களா??? அயல் நாட்டில் எங்களது திறமைக்கு அங்கிகாரம் இருக்கிறது, எங்களால் சொந்த மண்ணில் குறைந்தது இரண்டு வீட்டிலாவது அடுப்பெரிகிறது, தானமும், தர்மமும் முடிஞ்சவரை செய்கின்றோம். இங்கே அந்நிய தேச மோகத்திற்காக மட்டும்  நாங்கள் வரவில்லை.

என்னை குற்றம் சாட்டுபவரிடம் நான் எப்போதும் கேட்பது இது ஒன்றை தான். இத்தனை பேசும் நீங்கள் நாடு முன்னேற என்ன கிழித்தீர்கள்??? நாட்டை விடுங்கள், மாநிலம் இல்லை குறைந்தபட்சம் மாவட்டம், அவ்வளவு ஏன் உங்கள் ஊர் அல்லது தெரு மட்டுமேனும் ஏதாவது உபயோகமாக செய்து இருக்கிறீர்களா ???


ஆம் எனில், நானும் உங்களுடன் கைகோர்க்க தயார்..லட்சங்கள் வேண்டாம், உங்கள் லட்சியமே முக்கியம் என இந்நாட்டை துச்சமாக தூக்கி எரிந்து விட்டு வர நான் தயார்..கூறுங்கள் தோழர்களே.......

Monday, 20 February 2012





பெயரிழந்த பறவையாகிறேன்
நான்..
குற்றத்தின் சுமையும்
என் சிறகின் மேல்..






Saturday, 18 February 2012

"பெண்மை" - காதலர் தின போட்டியின் பரிசு பெற்ற என் கட்டுரை


காதல் உணரப்படும்போதும்,உரைக்கப்படும்போதும் நம் உள்ளத்தை உரசிப்பார்க்கும் உணர்வென்பதில் எவ்வித சந்தேகமுமில்லை.

அனைத்து உயிர்களிடத்தும் உருவாகின்ற ஓர் அற்புத உணர்வு காதல்..பார்க்கப்படும் விதம் தான் மாறும்.. ஐந்தறிவு, ஆறறிவு என பேதம் பார்க்காது காதல்.. ஓரறிவு ,ஐந்தறிவு உயிர்களோ அதற்கு தெரிந்த மொழியில் காதலிக்கின்றன, மனிதனோ காதலையே ஒரு மொழியாக்கி அதிலே அமிழ்ந்தும் போகின்றான்..

துன்பமும் இன்பமும் ஒரு புள்ளியில் இணைவதும் காதலால் தான் ..இணைந்த இதயங்கள் பிரிந்தும் ஒன்றுக்காக மற்றொன்று துடிப்பதும் காதலால் தான் ..


வாழ்க்கை பயணத்தில் எதோ ஒரு நிறுத்தத்தில் தடுக்கி விழுவதை காதலாக பார்க்கிறவர்கள் தான் இங்கு அதிகம்..தடுமாறி வீழுமுன் கைதூக்கி விடுவது தான் காதல்.. அது ஹார்மோன்களின் சுரப்பினால் பார்த்ததும் பொங்கி விடும் உணர்வன்று, உயிர் வரை தீண்டி உறவாடும் உணர்வுதான் காதல்..

ஆசை, காமம் காதலோடு இயைந்தவையாக இருக்கலாம், ஆனால் அது மட்டுமே காதலாக பார்க்கப்படும்போது தான் காதலின் புனிதம் தேய்ந்து விடுகிறது.. காதல் ஆசை அடங்கியபின்னும், காமம் கலைந்தபின்னும் உணர்வாக உள்ளுக்குள் தேங்கி நிற்கும்.


வைரமுத்து சொல்வது போல் உறுப்புகள் நீங்கிய உணர்வை அனுபவித்தால் தான் தெரியும் காதலின் சக்தியை, ஆழத்தை..


உனக்காக நான் , எனக்காக நீ இப்படிதான் இருக்க வேண்டும் என்பது கூட எதிர்பார்ப்புதான் , எதிர்பார்ப்புகளற்ற ஒரு உறவில் காதல் மிக எளிதாக இயைந்து போகிறது.. எனக்காக படைக்கப்பட்ட இன்னொரு உயிர் நீதான் என்ற உணர்வு யாரிடத்தில் பொங்குகிறதோ அந்த உணர்வு காதலாகி கசிந்து உயிராக மாறுகிறது..


இதய பரிமாற்றம் இதயத்தோடு இணைந்து வாழ்ந்தால் அங்கு காதல் பூரணமடைகிறது, அது உடலை சார்ந்து மட்டும் அமையும்போது காதல் நீர்த்து விடுகிறது..


பட்டாம்பூச்சியின் சிறகசைப்பின் மென்மையும் கல்லின் உறுதியும் ஒன்று சேர்ந்து இருப்பது தான் காதல், ஒரு இதயம் நினைப்பதை சொல்லாமலே அடுத்த இதயம் புரிந்து கொள்வது தான் காதல்..


மலையையும் சிறு கடுகாக பார்க்க தெரிந்த காதலுக்கு சிறிது நேர பிரிவே சுமையாகி வாழ்வை கசக்க செய்யும் மாயமும் அதற்கு தான் உண்டு..


உடல் தாண்டி உயிர் தீண்டுகையில் காதல் ஸ்பரிசிக்க படுகிறது.. அதுவே வாழ்வின் கருவாகவும் பிரபஞ்சமெங்கும் பரவுகிறது..


சற்றேறக்குறைய மரணத்தையும் ஜீவிதத்தையும் உணரவைப்பது காதல் தான்.. மானுடம் மனிதத்தன்மையோடு வாழ காதல் தான் காரணம், மென்மையான ஒருவன் மூர்க்கமாவதும், மூர்க்கன் மென்மையாவதும் காதலினால் தான்..


குடைக்குள்ளும், புதருக்குள்ளும் , கடற்கரையிலும் வளரும் காதல் காமத்தை மட்டுமே சென்றடையும், ஊனுருக்கி , உயிருறுக்கி,உள்ளுக்குள் வளரும் காதல் உன்னதத்தை அடையும்..


காதல் உணர்வை ருசிக்காதவன் மனிதனில்லை.. அப்படிப்பட்ட மனிதனும் இன்னும் பிறக்கவில்லை..


காத்திருந்து தவித்து, ஒன்றுடன் ஒன்று கலந்து ,ஒன்றுமில்லாமல் ஒருயிராய் கரைந்து விடுவது தான் காதல்..


காதலினை காதலிப்போம் , உயிர்கள் உய்வித்திருக்க... உணர்வுகள் உருமாறாதிருக்க..


கண்கள் வழி நுழைந்து உயிரை நிரப்பும் உணர்வினை அனுபவிக்க வேண்டுமா .. உயிர் மீட்டும் வீணையொலி காதில் ரீங்காரமிட வேண்டுமா... ஈருடல் ஓருயிர் சுமக்கும் மாயம் அறிய வேண்டுமா ..


காதலித்து பாருங்கள்.. காதல் உங்களை காதலிக்கும் .. ஆகையினால் காதல் செய்வீர்...


இரு கண்களின் இதய மொழி....

உயிரை உருக்கி உயிருக்குள்
இன்னொரு உயிரை பதியமிடும்
கடவுள்...

கண்சிமிட்டலின் மின்னல்
இடியாய் இதயம் இறங்கும்...

வாழ்க்கை பாதையின்
இனிய நிறுத்தம் ..

இதயக்கருப்பையின் நிரந்தர
கரு காதல்..


ஆகையினால் காதல் செய்வீர்...




ஒற்றை சொல்
வேரறுத்து விடுகிறது
சுலபமாய்
நமக்கான நட்பை..
முகம் மறைத்து வழிப்பிரிந்து
செல்கையில் தான்
இதயம் நிறைக்கிறது
உன் நினைவுகள்.
காட்சிகள் கோர்த்து கொண்டே
விரிகையில் சிறகொடிந்த
பறவையாய் வீழ்கிறேன்..
என் கர்வத்தின் முன்..
இருந்தும் ...
முற்றுப்புள்ளியாய்
உன் கடைசி வார்த்தை..

Wednesday, 8 February 2012

ஹைக்கூ

ஹைக்கூ

மூன்று வரிகளில் முழுமையாக சொல்ல வந்ததை சொல்வது. இருபதாம் நூற்றாண்டின்  ஆரம்பத்தில் இந்தியாவிற்கு அறிமுகமான கவிதை நடை இது. நாமெல்லாம் பெருமை பட்டு கொள்ளலாம் நம் பாட்டன் பாரதி தமிழுக்கு அறிமுகபடுத்தினார் தன் சுதேசமித்திரனில் என்று. 

சில பொதுவான விதிகள் 
  • ஒரு ஒற்றை வரியில் பதினேழு வார்த்தைகள் அல்லது மூன்று வரிகளில், அல்லது மூன்று வரிசைகளில் 5-7-5. 
  • இரண்டாவது வரிசையில் நீண்டு ஆனால் பதினேழு எண்ணிக்கையிலில்லாமல் 
  • ஒன்றின் கீழ் ஒன்றாக
  • ஒரே மூச்சில் படித்துவிடகூடிய
  • மூன்று வரிகளையும் வாசிக்கும்போது ஒரே வாக்கியமாக இல்லாமல் 
  • இரண்டாவது அல்லது மூன்றாம் வரிகளில் ஒரு இடைநிறுத்தம் கொண்டு 
  • எப்போதும் நிகழ்காலத்தில் 
  • உருவகபடுத்தாமல்
  • தெளிவாக விளங்கும்படி ஜென் கதைகளை போல் படித்ததும் புரிந்துவிடகூடிய 
  • எதுகை , மோனை பயன்படுத்தாமல்

சில எடுத்துகாட்டுக்கள் 

மூலைகள் வெட்டப்பட்டன 
காகித கப்பல் 
நான் மீண்டும் மிதக்க - (முதல் தமிழ் ஹைக்கூ - வெங்கட்ரமணி )

கண்ணாடியை துடைக்க துடைக்க 
என் முகத்தின் அழுக்கு 
தெளிவாகிறது 

பிம்பங்களற்ற  தனிமையில் 
ஒன்றையொன்று முகம்பார்த்தன
சலூன் கண்ணாடிகள் - நா . முத்துக்குமார்      

மீன் துள்ளுகிறது 
ஜலத்தில் 
சலசலக்கும் மேகங்கள் 

காரில் அடிபட்டு நசித்த பின்
நாயின்  வால் மட்டும் 
அசைகிறது 
-சுஜாதா 

ஒரு பெரிய வெறுமை 
வெட்கமில்லாத
 வானம் 

வகுப்பறை 
ஒரு குழந்தை கவனிக்கிறது பரவசத்துடன் 
ஜன்னலில் மேகம்

ஒரு நீண்ட பேச்சு 
நிறுத்தப்பட்டது 
ரயில் 
- அமுத பாரதி


முகம் பார்க்கும் நிலவை
முத்தமிட்டு உடைக்கும்
கரையோர தவளைகள்

பச்சை நாற்றுகளின்
பனித்துளி கண்ணாடிகளில்
வியர்வை பிம்பங்கள்


மழையில் நனையும்
ஓட்டை குடைகள்
மரங்கள்


தோல் தொழிற்சாலை-
நிலவு மூச்சு கஷ்டப்படுகிறது
கழிவு நீர்

-அறிவுமதி

குளம்
கொக்குகள் எங்கே பறந்தன -
விசில் ஒலி

(திருச்சி கவித்துவன் )

இருண்ட கிராமங்கள் வழியாக
இதயமற்ற நகரங்களுக்கு செல்லவும்
மின்சார கேபிள்கள் - முருகன்

உடைக்கும் வரை
உயிரோடிருந்தது
குழந்தையின் மான் பொம்மை

இருட்டில் அமர்ந்து
மௌனத்தை தின்னும்
அணைந்த மெழுகுவத்தி

(மு.முருகேஷ் )

பௌர்ணமி
வீடுகள் இழந்த
நண்டுகள்

பிணத்தின் மீது மாலை
தேனுக்கு வரும்
வீட்டு எறும்புகள்

 இரவு நேரம் தாலாட்டும் மின்விசிறி
எட்டிப்பார்க்கும்
 நிலா 
- மித்ரா

(நன்றி a. தியாகராஜன் ) 

இந்த கவிதைகள்  எல்லாமே விதிகளுக்கு உட்பட்டுதான் எழுதபட்டிருக்கின்றன என்று சொல்ல முடியாது. ஆனால் நம் மரபுக்கவிதைகளிலும் , புதுக்கவிதைகளிலும் சொல்லப்பட்டிருக்கும் இலக்கணம் மீறிய நடையில் அமைந்துள்ளன இக்கவிதைகள். சுஜாதா , அப்துல் ரஹ்மான் போன்றவர்கள் நிறைய எழுத்தாளர்களை ஹைக்கூ நடையில் எழுத ஊக்குவித்தார்கள் எனலாம் . ஆனால் சில கவிஞர்கள் அத்தனை விதிகளிலும் கவனம் கொண்டு ஹைகூவினை எழுத முடியாது என கூறியிருக்கிறார்கள். விதிகளை மீறி புது இலகனங்களை கொண்டு உருவான பல புதிய நடைகளை நாம் ஏற்றுக்கொண்டுதான் இருக்கிறோம். புதுமைகளை வரவேற்போம்.  

Wednesday, 4 January 2012

எந்த சந்தோஷமுமற்ற ,எந்த வேதனையுமற்ற ஏகாந்தம் இனிது.. இனிது. இனிது.. சில நொடிகள் , சில நிமிடங்கள் நம் வாழ்க்கையில் கைவரப்பெற்றிருக்கும் இந்த ஏகாந்தம் அனுபவித்தறிந்தவர்களுக்கு இனிதே தான்..



******************************************************************


தனக்கே தனக்கான எதிர்காலம் மற்றவர்களை நம்பி இருப்பதாக நினைப்பதில் தொடங்குகிறது முதல் ஏமாற்றம்.


*************************************************



சில தவறுகளுக்கான விளக்கங்கள் சொல்லப்படாமலிருப்பதே பல வன்மங்கள் உருவாகாமல் இருக்க வழி.


**************************************************



உன் நினைவுகளற்ற என் கனவுகளின் ஒரு மூலையில் கூட நானில்லை...


**************************************************



வளையாத மூங்கில்கள் தனித்தே நிற்க வேண்டியிருக்கிறது.


*************************************************





சில நேரங்களில் இறுகக்கோர்த்தும் விரலிடுக்குகளில் நழுவி விடுகிறது பிரியம்..


**************************************************





மனதின் அடி ஆழ வெறுப்புக்கள் தன் முழு வன்மத்தையும் வெளிப்படுத்தக்கூடிய ஏதோ ஒரு வார்த்தையினை நோக்கி காத்திருக்கிறது.


**************************************************



மிதந்தலையும் காற்றினை குறுக்கியிழுத்து இசையும்
குழலிசைப்போல் உன் நினைவினை நிறுத்தி
சுவாசிக்கும் சுவாசமே முழுமை பெறுகிறது...


**********************************************



ப்ரக்ஞையற்று சுற்றித்திரிகிறது காற்று
சூல் கொண்ட மேகங்களை கலைத்துவிட்டு


*****************************************





"நாட்கணக்கில்
மறைத்திருந்த உன் சுயம்
வெளிப்பட்ட கணம்
நீ நீயாகவும்
நான் நானாகவும்."

*****************************************





"
ஒவ்வொரு கவிதை
புனைதலிலும்
நேர்ந்து விடுகிறது
அடித்தல்
திருத்துதல்கள்.


கவிதையாக
இருப்பதினால் வலிகளை
வார்த்தைகளில்
அடக்கிகொண்டு விடுகிறது .."

*****************************************







"இருத்தலுக்கும் இல்லாதிருத்தலுக்கும்
இடையில் நீ..."

*****************************************





"விலகிவிடுதலுக்கான
பிரயத்தனங்களாய் மௌனங்களை
மென்று கொண்டிருக்கிறேன்.."

****************************************





"இடம் வலமென
மழை சுழன்றாடிய பின்
ஏதுமற்றதாய் இருக்கிறது வானம்."

*****************************************





"துயரங்களை தோள் மாற்ற முயல்கையில் அவை நழுவி செல்வதற்கான சாத்தியக்கூறுகளே அதிகம்.."

****************************************





"காரணமற்ற
உன் அழுகைகளினால்
வரும் கோபங்கள்
உன் காகிதகப்பல்கள்
மூழ்கிவிடாதிருக்க
பதைப்பதைப்பதில்
காணாமல் போய்விடுகின்றன."


***********************************







"ஒரே ஒரு கணத்தில் மாறக்கூடியவை தான் எல்லாம்..அந்த கணமே எல்லாவற்றையும் தீர்மானிக்கிறது."


************************************







"அவரவர் செய்கையில் அவரவருக்கான நியாயம் இருக்கத்தான் செய்கிறது..மறுக்க முடியாதபடி.."

************************************






























பாரதியின் சொல்


ரௌத்ரம் பழகு

கோபம் ஒரு மோசமான விருந்தினர் ,ஆனால் அந்த விருந்தினரிடம் பழக சொல்லி ஒரு மாபெரும் கவி சொல்கிறாரென்றால் அதன் அர்த்தம் என்னவாயிருக்கும்...


ரௌத்ரம் பழகு என்பதனை மேலோட்டமாக பார்த்தால் கோபம் கொள்ளசொல்கிறார் என்று நினைப்போம், ஆனால் களவும் கற்று(கத்தும்) மற என்று சொல்வது போல் ரௌத்ரம் பழகிகொள் , தெரிந்து கொள் என்று தான் இங்கு பாரதி சொல்கிறார்..


பயனற்ற , இடம், பொருள் தெரியாமல் வெளிபடுத்தப்படும் கோபம் பயனற்று தான் போகும் , ஆனால் அதனை "அக்னி குஞ்சொன்று கண்டேன், அதனை அங்கே ஒரு பொந்திடை வைத்தேன் என்று தான் சொன்னது போல் ரௌத்ரம் அறிந்து உன் மனதில் வைத்து ஆக்கபூர்வமாக மாற்றி தேவையான நேரத்தில் வெளிபடுத்து என்பது தான் கவிஞனின் எண்ணம் ...


கண்ணம்மாவை (கண்ணனை ) உருகி உருகி பாடிய பாரதி சோம்பி திரியும் மனிதரையும், அடிமை சங்கிலியில் நம்மை பிணைத்து வைத்திருந்த வெள்ளையரையும் கேள்வி கேட்கும்போது தன் ரௌத்ரத்தை தன் கவிதையில் கொண்டு வந்திருந்ததை நாம் அறிவோம்...


தேவையான நேரத்தில் வெளிபடுத்தப்பட்ட ரௌத்ரம் தீப்பொறியாய் எரிந்து இந்தியர் அனைவரின் நெஞ்சுக்குள்ளும் வேள்வி தீயாய் கனன்றது... அந்த தீயின் வேகம் தாளாமல் வெந்து (வெள்ளையரின் ஆதிக்கம்) , தணிந்தது (விடுதலை).


ரௌத்ரம் பழகி கொள்வோம் நாமும் பெருங்கவியின் வார்த்தை படி ...